Dövlət ümumi təhsil müəssisələrində dövlət standartları əsasında digər dildə təhsil almaq istəyən şagirdlərin müsahibədən keçirilməsi qaydası təsdiqlənib.

Realmedia.info xəbər verir ki, qaydalarda V–VII siniflər üzrə müsahibənin qiymətləndirmə meyarları da müəyyən edilib.
Məlumata əsasən, şagirdlərin tədris dili üzrə bilik və bacarıqları aşağıdakı istiqamətlər üzrə qiymətləndiriləcək:

Dinləyib-anlama bacarığı – şagird mətni dinləyərək əsas faktları və fikirləri ümumiləşdirməli, mövzu və ideyanı şərh etməli, obraz və hadisələrə münasibət bildirməlidir.

Oxu bacarığı – mətndəki məlumatların ardıcıllığını müəyyənləşdirmək, söz və ifadələrin mənasını kontekstdən çıxarmaq, müxtəlif mətnləri müqayisə etmək və yaradıcı yanaşma göstərmək tələb olunur.

Danışıq bacarığı – şagird müzakirələrdə iştirak etməli, fikir bildirməli, şifahi nitqdə yeni sözlərdən düzgün istifadə etməli, səs tonu, intonasiya, jest və mimikadan yerində yararlanmalıdır.

Yazı bacarığı – fikirlərin ardıcıllığına riayət olunmalı, ədəbi dil normalarına əməl edilməlidir.

Qaydalara əsasən, komissiya üzvlərinin verdiyi ballar toplanaraq orta qiymət çıxarılır. 12 və daha çox bal toplayan şagird müsahibədən uğurla keçmiş hesab olunur.

Müsahibənin nəticələri onun keçirildiyi tarixdən sonra 5 iş günü ərzində şagirdin elektron kabinetinə göndərilir.