Azərbaycanda ümumi təhsil müəssisələrində keçirilən “Son zəng” tədbirləri ilə bağlı yeni tələblər və təşkilati qaydalar müəyyən edilib.

Realmedia.infoxəbər verir ki, bununla bağlı məktəblərə müvafiq təlimatlar göndərilib.

Yeni qaydalara əsasən, “Son zəng” tədbirinin təşkilinə ümumi təhsil müəssisəsinin direktoru rəhbərlik edəcək və tədbir zamanı və ya ondan sonra baş verə biləcək hər hansı neqativ hadisəyə görə məsuliyyət daşıyacaq.

📌 Tədbirin keçirilmə qaydaları
Təlimata uyğun olaraq “Son zəng” tədbiri:
məktəbin həyətyanı sahəsində keçirilməlidir;
həyətyanı sahə olmadıqda idman və ya akt zalında təşkil olunmalıdır;
tədris prosesinə mane olmamalı və təhlükəsiz şərait təmin edilməlidir;
13 iyun 2026-cı il tarixində saat 08:00, 09:00 və ya 10:00-da başlamalı və maksimum 2 saat davam etməlidir.

👥 İştirakçılar və qaydalar
Tədbirdə aşağıdakı şəxslərin iştirakı nəzərdə tutulur:
1-ci və 11-ci sinif şagirdlərinin valideynləri (qəyyum və ya himayəçilər);
Təhsili idarəetmə orqanlarının nümayəndələri;
Polis əməkdaşları və yerli icra hakimiyyəti nümayəndələri;
Şəhid ailələri və qazilər;
Məktəbin ictimai həyatında fəallığı ilə seçilən valideynlər.

👔 Geyim və davranış qaydaları
Şagirdlərin tədbirdə iştirakı üçün də xüsusi tələblər müəyyən edilib:
məzunlar məktəbli formasında olmalıdır;
xarici görünüş səliqəli və nizam-intizama uyğun olmalıdır;
tədbirdə bayağı musiqilərin səsləndirilməsinə icazə verilmir.

🎭 Tədbirin təşkili və ssenari
“Son zəng” tədbiri milli-mənəvi dəyərlərə uyğun hazırlanmış rəsmi və bədii hissədən ibarət ssenari əsasında keçirilməlidir. Ssenari məktəb rəhbərliyi tərəfindən imzalanaraq təsdiqlənməlidir.
Açılış mərasimi Dövlət Himninin səsləndirilməsi ilə başlayacaq, daha sonra şəhidlərin xatirəsi bir dəqiqəlik sükutla yad ediləcək.

⚠️ Digər məhdudiyyətlər
Təlimatda həmçinin qeyd olunur ki:
rəsmi qonaqlar üçün xüsusi hazırlıq və hədiyyə təqdimatı qadağandır;
masalarda yalnız içməli su ola bilər;
gül dəstələrinin verilməsinə icazə verilmir;
tədbirin bədii hissəsi yalnız məktəbin daxili imkanları hesabına təşkil edilməlidir.

Qərara əsasən, pedaqoji şuralarda müvafiq müzakirələr aparılmalı, valideynlər əvvəlcədən məlumatlandırılmalı və təlimatlar məktəblərin görünən yerlərində yerləşdirilməlidir.