Tam (11 illik) orta təhsil səviyyəsi üzrə 15 mart 2026-cı il tarixində keçirilmiş buraxılış imtahanının nəticələri açıqlanıb.

Realmedia.info xəbər verir ki, bu barədə Dövlət İmtahan Mərkəzi (DİM) məlumat yayıb.

Bildirilib ki, imtahanda iştirak edən şagirdlər xüsusi portal vasitəsilə iş nömrəsi (8 rəqəmli şagird kodu) və şəxsiyyət vəsiqəsinin nömrəsi və ya FİN kodunu daxil etməklə nəticələrini öyrənə bilərlər. Nəticələrlə yanaşı, cavab vərəqinin qrafik təsviri, düzgün cavablar və açıq tipli tapşırıqlar üzrə qiymətləndirmə meyarları da təqdim olunur.
Şagirdlər həmçinin mobil operatorlar – Azercell, Bakcell və Nar vasitəsilə “iş nömrəsi”ni 7727 nömrəsinə göndərməklə də nəticələrini əldə edə bilərlər.

DİM qeyd edib ki, yazı işlərinin yoxlanılması tam şəkildə onlayn həyata keçirilib. Markerlər prosesi məsafədən icra edib və yoxlama zamanı üztanıma texnologiyası tətbiq olunub. Eyni zamanda, işlərin şifrələnməsi, təsadüfi paylanması və markerlərin kalibrləməsi kimi bütün prosedur qaydalarına riayət olunub.

İmtahanda şagirdlərə ümumilikdə 85 tapşırıq təqdim edilib və hər fənn üzrə maksimal bal 100 olmaqla ümumi nəticə 300 bal təşkil edib.

Məlumata görə, imtahanda iştirakı nəzərdə tutulan 58 144 nəfərdən 379 nəfər iştirak etməyib, 10 nəfər isə qayda pozuntusuna görə imtahandan xaric olunub. İştirakçılar arasında 9 nəfər maksimum – 300 bal toplayaraq ən yüksək nəticəni göstərib.

İmtahan nəticələri ilə bağlı narazılığı olanlar üçün Apellyasiya Komissiyası fəaliyyət göstərəcək. Müraciətlər 27 aprel saat 10:00-dan 29 aprel saat 17:00-dək elektron qaydada qəbul ediləcək. Qeyd olunan müddətdə qeydiyyatdan keçməyənlər sonradan müraciət edə bilməyəcək.

Şagirdlərə tövsiyə olunur ki, apellyasiya müraciəti etməzdən əvvəl nəticələrini, cavab vərəqlərini və qiymətləndirmə meyarlarını diqqətlə yoxlasınlar. Qeyd olunur ki, əvvəlki illərin təcrübəsinə əsasən, müraciət edənlərin bir qismi tapşırıqlara ümumiyyətlə cavab vermədən və ya meyarlarla tanış olmadan ərizə təqdim edir və bu tip müraciətlər araşdırılmır.