Prezident İlham Əliyev qeyri-neft-qaz mallarının ixracının stimullaşdırılması və daşıma xərclərinin dəstəklənməsi ilə bağlı əlavə tədbirlər haqqında fərman imzalayıb.

Realmedia.info xəbər verir ki, sənədə əsasən, Azərbaycan mənşəli qeyri-neft-qaz mallarının ixracı zamanı çəkilən nəqliyyat xərclərinin bir hissəsi dövlət büdcəsi hesabına qarşılanacaq.

Fərmanda qeyd olunur ki, qeyri-neft-qaz sektorunun inkişafı ölkənin iqtisadi dayanıqlığının gücləndirilməsi, xarici bazarlardakı qeyri-sabitliyin milli iqtisadiyyata təsirlərinin azaldılması və strateji iqtisadi suverenliyin təmin edilməsi baxımından xüsusi əhəmiyyət daşıyır.

Yeni qaydalara əsasən, Azərbaycan mənşəli qeyri-neft-qaz məhsullarının xarici ölkələrə daşınması zamanı çəkilən xərclərin müəyyən hissəsi ixracatçılara dəstək kimi ödəniləcək. Həmçinin Naxçıvan Muxtar Respublikasında istehsal olunan qeyri-neft-qaz mallarının ölkənin digər ərazilərinə daşınması üçün də dövlət tərəfindən maliyyə dəstəyi veriləcək.

Sənədə görə, dəmir yolu, hava və dəniz nəqliyyatı, eləcə də Azərbaycanda qeydiyyatda olan avtomobillərlə daşınma zamanı nəqliyyat xərclərinin 70 faizi, xarici qeydiyyatlı avtomobillərlə daşınma zamanı isə 50 faizi dövlət tərəfindən qarşılanacaq.

Bundan əlavə, Naxçıvanda istehsal olunan məhsulların Azərbaycanın digər bölgələrinə quru yolla daşınması üçün çəkilən xərclərin 70 faizinin də dövlət büdcəsindən ödənilməsi nəzərdə tutulur.

Fərmana əsasən, ixrac və daxili daşıma dəstəklərinin ödənilməsi ilə bağlı mexanizmlər Nazirlər Kabineti və İqtisadiyyat Nazirliyi tərəfindən hazırlanacaq. Müvafiq normativ sənədlərin üç ay müddətində təsdiqlənməsi tapşırılıb.

Qeyd edək ki, fərmanın əsas müddəaları 2026-cı il sentyabrın 1-dən qüvvəyə minəcək və 2036-cı ilədək tətbiq olunacaq.