Xankəndi şəhərində illik istehsal gücü 25 milyon cüt olan iş əlcəyi istehsalı müəssisəsi fəaliyyətə başlayıb.

Realmedia.info xəbər verir ki, “GP Safety” MMC tərəfindən yaradılan müəssisədə istehsal edilən əlcəklər sənaye və təsərrüfat sahələrində istifadə üçün nəzərdə tutulub.

Məlumata görə, müəssisədə ilkin mərhələdə 35 nəfər işlə təmin olunub. İşə qəbul olunanların əksəriyyətini Xankəndiyə köçmüş keçmiş məcburi köçkünlər təşkil edir.
Müəssisədə dörd müxtəlif növdə əlcək istehsal olunacaq və məhsullar əsasən daxili bazara yönəldiləcək. Gələcəkdə isə istehsal olunan məhsulların ixracı da planlaşdırılır.

Layihənin ümumi investisiya həcmi 3,5 milyon manat təşkil edir. Müəssisənin yaradılmasına dövlət dəstəyi çərçivəsində Azərbaycan Biznesinin İnkişafı Fondu tərəfindən 1 milyon manat güzəştli kredit ayrılıb, həmçinin idxal olunan texnika və avadanlıqlar üzrə ƏDV güzəştləri tətbiq edilib.

Qeyd edək ki, yeni istehsal müəssisəsi Qarabağ bölgəsində iqtisadi fəallığın artırılması, yerli əhalinin məşğulluğunun təmin edilməsi və sənaye potensialının inkişafına töhfə verməyi hədəfləyir.