Azərbaycan Respublikasının Prezidenti İlham Əliyev Sumqayıt Sənaye Parkında polipropilen və laminatlı kisə istehsalı müəssisəsinin təməlqoyma mərasimində iştirak edib.

Yeni müəssisə “Nun” MMC tərəfindən tikiləcək və 1 hektar sahəni əhatə edəcək. Layihədə Almaniya texnologiyası tətbiq olunacaq və illik 3 120 ton məhsul istehsal gücü nəzərdə tutulur. Məhsullar əsasən daxili bazarın tələbatını ödəyəcək, müəssisə isə təxminən 140 yeni iş yeri yaradacaq.

Ümumilikdə layihənin investisiya həcmi 11,2 milyon manat təşkil edir. Layihəyə Azərbaycan Biznesinin İnkişafı Fondu tərəfindən 3 milyon manat güzəştli kredit ayrılacaq, həmçinin avadanlıqların idxalında ƏDV və gömrük rüsumlarından azad olunması təmin ediləcək.

Prezident İlham Əliyev bildirib ki, bu müəssisə ölkədə sənaye potensialının güclənməsinə, iş yerlərinin yaradılmasına və daxili istehsal imkanlarının artırılmasına mühüm töhfə verəcək.