Azərbaycan Respublikasının Prezidenti İlham Əliyev Ağdərə rayonunda inşa edilmiş “Qozlukörpü” Su Elektrik Stansiyasının (SES) açılış mərasimində iştirak edib.
Dövlət başçısına stansiyanın texniki xüsusiyyətləri, istehsal gücü və regionun enerji təminatındakı rolu barədə ətraflı məlumat verilib. Bildirilib ki, “Qozlukörpü” SES ölkənin bərpaolunan enerji potensialının artırılmasına, həmçinin işğaldan azad olunmuş ərazilərdə dayanıqlı enerji infrastrukturunun formalaşdırılmasına mühüm töhfə verəcək.
Müasir texnologiyalar əsasında qurulan su elektrik stansiyası ekoloji cəhətdən təmiz enerji istehsalına imkan yaradır, yanacaq sərfiyyatının azalmasına və ətraf mühitin qorunmasına xidmət edir. Layihə eyni zamanda bölgənin sosial-iqtisadi inkişafına, yeni iş yerlərinin yaradılmasına müsbət təsir göstərir.
Prezident İlham Əliyev açılış mərasimində görülən işləri yüksək qiymətləndirib, gələcəkdə Qarabağ və Şərqi Zəngəzurda “yaşıl enerji” layihələrinin genişləndirilməsinin vacibliyini vurğulayıb.

📸 Açılış mərasimindən fotolar təqdim olunur.