Ermənistanda növbədənkənar parlament seçkiləri ərəfəsində xaricdən ölkəyə gələn vətəndaşlar sərhəd-keçid məntəqələrində və hava limanlarında hərbi çağırış vərəqələri ilə qarşılaşırlar.

Məlumata görə, parlament seçkilərində iştirak etmək məqsədilə xaricdən, o cümlədən Rusiyadan Ermənistana gələn hərbi mükəlləfiyyətli şəxslərə 25 günlük təlim toplanışlarına qatılmaları üçün çağırışlar təqdim olunur.

Ermənistan baş nazirinin aparat rəhbərinin köməkçisi Taron Çaxoyan bildirib ki, çağırışa məhəl qoymayan şəxslər qanunvericiliyə uyğun olaraq cinayət məsuliyyətinə cəlb edilə bilərlər.

Onun sözlərinə görə, xaricdən gələn Ermənistan vətəndaşlarının hərbi xidmətlə bağlı öhdəlikləri qüvvədə qalır və onlar təlim toplanışlarına cəlb olunurlar.

Məsələ ilə bağlı açıqlama verən Ermənistanın müdafiə naziri Suren Papikyan da bu qaydanın yalnız Rusiyadan gələnlərə aid olmadığını vurğulayıb. Nazir bildirib ki, Fransa, ABŞ və digər ölkələrdən Ermənistana gələn bütün hərbi mükəlləfiyyətli vətəndaşlar eyni tələblərə tabedirlər.

Qeyd edək ki, Ermənistanda hərbi təlim toplanışları martın 31-dən başlayıb və iyunun 19-dək davam edəcək.

Xatırladaq ki, ölkədə növbədənkənar parlament seçkiləri iyunun 7-də keçiriləcək.