Son dövrlər vətəndaşlar arasında “Card to Card” pul köçürmələri geniş yayılıb. Bu üsul insanların daha sürətli və rahat şəkildə bir-birinə pul göndərməsinə imkan yaradır.

Lakin bu əməliyyatlardan sui-istifadə halları da müşahidə olunur. Belə ki, bəzi sahibkarlar vergidən yayınmaq məqsədilə malların, xidmətlərin və ya işlərin dəyərini kassa aparatı, POS-terminal və ya bank hesabı vasitəsilə deyil, öz adlarına açdırdıqları kartlara “Card to Card” köçürmələri ilə qəbul etməyə çalışırlar.

Bu kimi halların qarşısının alınması üçün banklar tərəfindən şübhəli hesab edilən əməliyyatlar barədə məlumatlar vergi orqanlarına təqdim edilir və həmin əməliyyatlar üzrə vergi hesablanması aparıla bilər.

Məsələ ilə bağlı Vəkillər Kollegiyasının üzvü, vergi sahəsi üzrə ekspert Elvin Şərifov bildirib ki, “Banklar haqqında” qanunun 41-ci maddəsinə əsasən kart məlumatları bank sirri hesab olunur və bu məlumatlar yalnız kart sahibinin razılığı ilə üçüncü tərəflərə verilə bilər.

Onun sözlərinə görə, şəxsin yazılı razılığı olmadan banklar onun kart məlumatlarını vergi orqanlarına təqdim edə bilməz. Bu qaydanı pozan banklar qanunvericiliklə məsuliyyət daşıyır və vətəndaşlar məhkəmə qaydasında iddia qaldıra bilərlər.

Ekspert qeyd edib ki, Vergi Məcəlləsinə uyğun olaraq vergi orqanları yalnız vergi ödəyicilərinə aid məlumatları banklardan tələb edə bilər. Bu isə əsasən sahibkarlıq fəaliyyəti ilə məşğul olan şəxslərə aiddir.

E.Şərifovun sözlərinə görə, sahibkarlıq fəaliyyəti göstərən fiziki şəxslər vergi uçotunda qeydiyyata alınmalıdır. Əgər onlar könüllü şəkildə qeydiyyata düşmürlərsə, vergi orqanları onları məcburi qaydada uçota alaraq rəsmi bildiriş göndərir.

Vergi Məcəlləsinə əsasən isə gəlir, mənfəət, əmlak, torpaq və təqdim edilən mal, iş və xidmətlər vergitutma obyektlərinə daxildir. Yoxlamalar zamanı vergi orqanları bütün halları, o cümlədən vergi ödəyicisinin xeyrinə olan məlumatları da nəzərə almalıdır.

Ekspert əlavə edib ki, bank məlumatları əsasında şəxsin sahibkarlıq fəaliyyəti ilə məşğul olduğu təsdiqləndikdə, vergi orqanları onu uçota alır və qanunvericiliyə uyğun olaraq vergi hesablanması həyata keçirir.

Beləliklə, qanunvericiliyə əsasən vergi orqanları yalnız əsaslandırılmış hallarda və sahibkarlıq fəaliyyəti sübuta yetirildikdə əlavə vergi hesablanması apara bilərlər.