Bu gün Azərbaycandan Ermənistana növbəti yanacaq tədarükü həyata keçirilib.

Məlumata görə, "Azərbaycan Dəmir Yolları" QSC-nin Güzdək stansiyasından ümumilikdə 2 475 ton dizel yanacağı daşıyan 42 vaqon Böyük Kəsik stansiyası istiqamətində yola salınıb. Yük Gürcüstan ərazisindən tranzit keçərək Ermənistana çatdırılacaq.

Qatarın saat 16:00-da Güzdək stansiyasından hərəkətə başladığı bildirilir.

Qeyd edək ki, indiyədək Azərbaycandan Ermənistana 10 min tondan çox dizel yanacağı, 979 ton Aİ-92 markalı benzin və 2 955 ton Aİ-95 markalı benzin ixrac olunub.

Xatırladaq ki, Ermənistana yanacaq ixracına 2025-ci il dekabrın 18-də başlanılıb. Həmin tarixdə bu ölkəyə ilk olaraq 1 220 ton Aİ-95 markalı avtomobil benzini göndərilib.

Prezident İlham Əliyevin 2025-ci ilin oktyabr ayında imzaladığı qərardan sonra, işğal dövründən qüvvədə olan Azərbaycandan Ermənistana yüklərin tranziti ilə bağlı məhdudiyyətlər aradan qaldırılıb və bu istiqamətdə daşımalar davam etdirilir.