Azərbaycan Respublikasının Baş naziri Əli Əsədov iyunun 4-də Bakıda keçirilən Türk Dövlətləri Təşkilatına (TDT) üzv ölkələrin Mərkəzi Banklar Şurasının iclasının iştirakçıları ilə görüş keçirib.

Realmedia.info xəbər verir ki, bu barədə Nazirlər Kabineti məlumat yayıb.

Görüş zamanı Mərkəzi Banklar Şurasının iclasının əhəmiyyəti vurğulanıb, tədbirin TDT-yə üzv ölkələrin maliyyə sektorları arasında əməkdaşlığın daha da gücləndirilməsinə və bu sahədə mərkəzi bankların rolunun artırılmasına töhfə verəcəyinə əminlik ifadə olunub.

Bildirilib ki, Türk Dövlətləri Təşkilatına üzv ölkələr arasında qarşılıqlı etimada və ortaq maraqlara əsaslanan əməkdaşlıq müxtəlif istiqamətlər üzrə uğurla inkişaf edir. Azərbaycanın cari ildə TDT-yə sədrliyi çərçivəsində iqtisadiyyat, ticarət, investisiya, nəqliyyat, enerji, maliyyə və humanitar sahələrdə əməkdaşlığın genişləndirilməsinə xüsusi önəm verdiyi diqqətə çatdırılıb.

Görüşdə Azərbaycanda maliyyə-bank sektorunun modernləşdirilməsi istiqamətində həyata keçirilən islahatlar, maliyyə xidmətlərinin keyfiyyətinin artırılması, şəffaflığın təmin edilməsi və bank sisteminin dayanıqlığının gücləndirilməsi sahəsində əldə olunan nəticələr barədə də fikir mübadiləsi aparılıb.

Tərəflər həmçinin Türk Dövlətləri Təşkilatı çərçivəsində maliyyə-bank sahəsində əməkdaşlığın inkişaf perspektivlərini müzakirə ediblər.