Azərbaycan Beynəlxalq Əmək Təşkilatının (BƏT) daha bir Konvensiyasına qoşulub.

Realmedia.info xəbər verir ki, BƏT-in Cenevrədə keçirilən Beynəlxalq Əmək Konfransının 114-cü sessiyasında iştirak edən əmək və əhalinin sosial müdafiəsi naziri Anar Əliyev ölkəmizin qoşulduğu "Əməyin Təhlükəsizliyi və Gigiyenasının Təşviq Edilməsinin Əsasları haqqında" 187 nömrəli Konvensiya ilə bağlı bildirişi təşkilatın Baş direktoru Jilber Hunqboya təqdim edib.

Görüş zamanı bildirilib ki, Azərbaycan artıq BƏT-in 60 Konvensiyasına qoşulub və hazırda daha bir sıra konvensiyaların ratifikasiyası imkanları nəzərdən keçirilir.

Sessiya çərçivəsində Anar Əliyev Türkiyənin əmək və sosial müdafiə naziri Vedat İşıkhanla görüşərək iki ölkə arasında əmək və sosial müdafiə sahəsində əməkdaşlığın inkişaf perspektivlərini müzakirə edib. Tərəflər işçi qüvvəsinin ixracı istiqamətində əməkdaşlığın daha da genişləndirilməsinin vacibliyini vurğulayıblar.

Nazir Litvanın sosial təminat və əmək naziri Yurate Zaylskyene ilə görüşündə isə sosial sahədə əməkdaşlığın gücləndirilməsi və Litvanın əmək bazarının tələblərinə uyğun olaraq Azərbaycandan işçi qüvvəsinin cəlb olunması imkanlarını müzakirə edib.

Həmçinin BƏT rəhbərliyinin nümayəndələri ilə keçirilən görüşlərdə Azərbaycanın təşkilatla əməkdaşlığının yeni istiqamətlər üzrə genişləndirilməsi məsələləri ətrafında fikir mübadiləsi aparılıb.