Prezident İlham Əliyev Birləşmiş Millətlər Təşkilatının Birləşmiş Millətlər Təşkilatı “Kibercinayətkarlığa qarşı” Konvensiyasının Azərbaycanın müvafiq bəyanat və qeyd-şərtləri ilə təsdiq edilməsi haqqında qanunu imzalayıb.

Qanuna əsasən, Konvensiya çərçivəsində kibercinayətlərlə bağlı qarşılıqlı hüquqi yardım sorğularının qəbulu, icrası və aidiyyəti qurumlara yönləndirilməsi Dövlət Təhlükəsizliyi Xidməti tərəfindən həyata keçiriləcək. Eyni zamanda kibercinayətkarlığın qarşısının alınması məqsədilə digər iştirakçı dövlətlərlə əməkdaşlıq və 24 saat fəaliyyət göstərən əlaqə mərkəzinin funksiyaları da bu quruma həvalə olunub.

Ekstradisiya və ya müvəqqəti həbsə dair beynəlxalq sorğuların göndərilməsi və qəbulu isə Ədliyyə Nazirliyi tərəfindən icra ediləcək.

Qeyd edək ki, Konvensiya 24 dekabr 2024-cü ildə BMT Baş Assambleyasında qəbul edilib. Sənəd kibercinayətkarlıqla mübarizə sahəsində qlobal miqyasda vahid və hüquqi cəhətdən məcburedici beynəlxalq çərçivə yaradan ilk sənəd hesab olunur.

Məlumata görə, Azərbaycan sənədin hazırlanması prosesində fəal iştirak edib və çoxtərəfli danışıqlarda konstruktiv mövqe nümayiş etdirərək Konvensiyanın mətninin formalaşmasına töhfə verib.

Konvensiyanın ratifikasiyası təhlükəsizlik və hüquq-mühafizə orqanlarının fəaliyyətini gücləndirəcək, elektron sübutlarla bağlı beynəlxalq prosedurların tətbiqini asanlaşdıracaq və transmilli istintaqların effektivliyini artıracaq.