Bu gündən “Xüsusi icra məmurları haqqında” qanun qüvvəyə minir. Ölkə.az xəbər verir ki, sənəd 6 fəsil və 38 maddədən ibarətdir.
Qanun xüsusi icra məmurlarının fəaliyyətinin təşkili, hüquqi statusu və fəaliyyətinə nəzarəti tənzimləyir. Xüsusi icra məmuru məhkəmələrin və qanunla icrası icra məmurlarına həvalə edilmiş digər orqanların sənədlərini icra etmək üçün xüsusi icra məmuru şəhadətnaməsi almış fiziki şəxs olacaq. Onun fəaliyyəti dövlət hakimiyyətinin nümayəndəsi hesab olunmur və sahibkarlıq fəaliyyəti sayılmır.
Xüsusi icra məmurunun qərarları hüquqi qüvvəsinə görə dövlət icra məmurunun qəbul etdiyi qərarlara bərabərdir. İcra sənədlərinin icrası ilə bağlı onun qanuni tələbləri bütün dövlət və bələdiyyə orqanları, hüquqi şəxslər və fiziki şəxslər üçün məcburidir. Lazımi məlumatlar və sənədlər isə vaxtında təqdim olunmalıdır.
Qanuna əsasən, xüsusi icra sistemi ölkənin inzibati ərazi vahidləri üzrə mərhələli qaydada tətbiq olunacaq.