Sumqayıt sakinləri iki gündür qaz smart kartlarına pul yükləyə bilmədiklərinə görə “Azəriqaz” İstehsalat Birliyinə etiraz ediblər.
Musavat.com xəbər verir ki, etiraz aksiyası zamanı vətəndaşlar yolu bağlayaraq problemlərinin həllini tələb ediblər. Sakinlərin sözlərinə görə, ödəniş terminalları vasitəsilə qaz kartlarına pul yatırılsa da, vəsait kartlara yüklənmir, balans boş göstərilir. Daha ciddi məqam isə odur ki, terminallar pul qəbul etsə də, ödəniş qaz sayğacında əks olunmur və qaz təminatında heç bir dəyişiklik baş vermir.
Bildirilir ki, yaranmış vəziyyət vətəndaşlar arasında ciddi narazılığa səbəb olub və problem yalnız Sumqayıtla məhdudlaşmır, ölkə üzrə bir çox abonenti əhatə edir. Vətəndaşlar ödənişlərin bərpasını və terminallardan çıxan vəsaitin taleyinə aydınlıq gətirilməsini tələb edirlər.
“Azəriqaz” İB bildirir ki, smart kart tipli bəzi qaz sayğaclarının ödəniş sistemində problem 1 yanvar tarixindən yaranıb və həmin gün axşam saat 20:00-da aradan qaldırılıb. Lakin kütləvi əməliyyatlar zamanı sistem yenidən xəta ilə qarşılaşıb. Yeni ilin əvvəli olduğuna görə müraciətlərin çoxluğu səbəbindən sistemdə bəzi xətalar baş verib. Yaranmış çətinliyin qısa müddətdə aradan qaldırılması üçün işlər davam etdirilir.
Qeyd edək ki, bu problem bu gün paytaxtın əksər yerlərində də müşahidə olunub və bir çox ərazilərdə həll edilib.