Dekabrın 31-dən yanvarın 1-nə keçən gecə qaz sərfiyyatı limitinin sıfırlanmasından sonra “Azəriqaz” İstehsalat Birliyinə məxsus smart kart tipli qaz sayğaclarında texniki nasazlıq qeydə alınıb.
İstifadəçilər bildirirlər ki, artıq 20 saatdan çoxdur smart kartlara ödəniş etmək mümkün deyil. Məlumata görə, ödəniş terminalları vasitəsilə kartlara vəsait yüklənmir.
“Azəriqaz” İB yaranmış problemin terminallarla bağlı olduğunu açıqlasa da, terminal xidməti göstərən qurumlar öz sistemlərində hər hansı nasazlıq olmadığını, problemin məhz “Azəriqaz”ın daxili sistemindən qaynaqlandığını bildirirlər.
Qeyd edək ki, məsələ saatlardır sosial şəbəkələrdə geniş müzakirə olunsa da, bu vaxta qədər “Azəriqaz” tərəfindən rəsmi və ətraflı açıqlama verilməyib.