Dekabrın 22-də Bakıda və Abşeron yarımadasında hava şəraiti dəyişkən buludlu olacaq
Dekabrın 22-də Bakıda və Abşeron yarımadasında hava şəraitinin dəyişkən buludlu olacağı, əsasən yağmursuz keçəcəyi gözlənilir. Bu barədə Realmediaya Milli Hidrometeorologiya Xidmətindən məlumat verilib.
Məlumata görə, dekabrın 21-dən 22-nə keçən gecə yarımadanın bəzi ərazilərində qısamüddətli yağış ehtimalı var. Səhər saatlarında ayrı-ayrı yerlərdə zəif duman müşahidə olunacaq. Mülayim cənub-qərb küləyi əsəcək.
Havanın temperaturu gecə saatlarında 3–6 dərəcə isti, gündüz isə 7–9 dərəcə isti təşkil edəcək. Atmosfer təzyiqi 765 mm civə sütunundan 762 mm civə sütununa enəcək. Nisbi rütubət gecə 80–85 faiz, gündüz isə 60–65 faiz olacaq.
Azərbaycanın rayonlarında isə hava şəraitinin əsasən yağmursuz keçəcəyi proqnozlaşdırılır. Gecə və səhər saatlarında bəzi ərazilərdə duman gözlənilir. Qərb küləyi üstünlük təşkil edəcək.