Zaqatala rayonunda dövlət sərhədini qanunsuz keçməyə cəhd göstərən xarici ölkə vətəndaşları saxlanılıblar.

RealMedia.info xəbər verir ki, bu barədə Dövlət Sərhəd Xidmətinin Mətbuat Mərkəzi məlumat yayıb.

Bildirilib ki, “Zaqatala” sərhəd dəstəsinin xidməti ərazisində Azərbaycandan Gürcüstan istiqamətinə dövlət sərhədini pozmağa cəhd göstərən 6 nəfər Nigeriya Federativ Respublikası vətəndaşı keçirilmiş əməliyyat-qoşun tədbirləri nəticəsində saxlanılıb.

Saxlanılan şəxslərin 46 yaşlı İguare Oliver Osagie, 40 yaşlı Ogungbure Adesoji Austin, 34 yaşlı Akinniyi Olamilekan Sunday, 32 yaşlı Adele Moshood Adekunle, 29 yaşlı King Tamarasinla Gloria və 28 yaşlı Ajala Oluvafemi Moses olduğu bildirilib.

Dövlət Sərhəd Xidmətindən verilən məlumata görə, faktla bağlı zəruri əməliyyat-istintaq tədbirləri həyata keçirilir.

Hadisənin bütün təfərrüatlarının müəyyənləşdirilməsi istiqamətində araşdırmalar davam etdirilir.