Pankisi dərəsində “İslam Dövləti” (İŞİD) terror qruplaşması ilə əlaqədə şübhəli bilinən üç Gürcüstan vətəndaşı saxlanılıb.

Realmedia.info xəbər verir ki, bu barədə Gürcüstan Dövlət Təhlükəsizliyi Xidmətinin rəhbərinin birinci müavini Laşa Maqradze məlumat verib.

Bildirilib ki, əməliyyat mayın 19-na keçən gecə Pankisi dərəsinin Omalo, Birkiani və Cokolo kəndlərində keçirilib.
Araşdırmalara əsasən, saxlanılan şəxslərin İŞİD sıralarına qoşulduğu, xarici kuratorlardan təlimatlar aldığı və terror fəaliyyəti məqsədilə qrup yaratmağa cəhd göstərdiyi iddia olunur.

Məlumata görə, onlar gizli görüşlər keçirib, İŞİD ideologiyasının təbliği ilə məşğul olublar.

Əməliyyat zamanı odlu silah, sursat, partlayıcı maddələr, kompüter avadanlıqları və mobil telefonlar götürülüb. Həmçinin İŞİD İslam Dövləti (İŞİD) bayrağı və simvolları da aşkar edilib.

Faktla bağlı Gürcüstan Cinayət Məcəlləsinin müvafiq maddələri üzrə istintaq aparılır. Saxlanılan şəxsləri 17 ilədək azadlıqdan məhrumetmə cəzası gözləyir.