Aprelin 30-da saat 14 radələrində Milli Onkologiya Mərkəzində partlayış baş verməsi ilə bağlı Yasamal Rayon Prokurorluğuna məlumat daxil olub.

Realmedia.info xəbər verir ki, bu barədə Azərbaycan Respublikasının Baş Prokurorluğu məlumat yayıb.

Bildirilib ki, ilkin araşdırmalar zamanı onkoloji xəstə kimi qeydiyyatda olan 1988-ci il təvəllüdlü Mübariz Əliyevin qanunsuz olaraq əldə edib saxladığı partlayıcı vasitəni tibb müəssisəsinin Radiologiya şöbəsində partlatdığı müəyyən edilib. Nəticədə o, həkim Asif Nəsirovu ümumi təhlükəli üsulla qəsdən öldürməyə cəhd etməkdə şübhəli bilinir.

Hadisə zamanı Mübariz Əliyev aldığı xəsarətlərdən hadisə yerində ölüb. Ağır bədən xəsarətləri alan Asif Nəsirovun vəziyyətinin ağır olduğu bildirilir, onun müalicəsi xəstəxanada davam etdirilir.

Faktla bağlı hadisə yerinə hüquq-mühafizə orqanlarının əməkdaşlarından ibarət istintaq-əməliyyat qrupu cəlb olunub, əraziyə baxış keçirilib və maddi sübutlar toplanıb. Meyitin müayinəsi üçün məhkəmə-tibbi ekspertiza təyin edilib.

Hadisə üzrə Yasamal Rayon Prokurorluğunda Cinayət Məcəlləsinin 29, 120.2.4 (ümumi təhlükəli üsulla adam öldürməyə cəhd) və 228.1-ci (qanunsuz olaraq partlayıcı maddələrin əldə edilməsi və saxlanılması) maddələri ilə cinayət işi başlanıb.

Hazırda istintaq davam edir, partlayıcı maddənin əldə edilmə mənbəyi və hadisənin baş vermə səbəbləri araşdırılır.