Bakıda bir yaşlı körpənin xəstəxanada ölümü ilə bağlı araşdırma aparılır.

Realmedia.info xəbər verir ki, Binəqədi rayon ərazisində 2025-ci il təvəllüdlü Ağahüseyn Elşən oğlu Əliyev müayinəyə aparıldığı xəstəxanada həyatını itirib.

Məlumata görə, azyaşlı aprelin 25-i saat 11:00 radələrində təcili tibbi yardım briqadası tərəfindən Bakı Baş Səhiyyə Mərkəzinin strukturuna daxil olan 1 nömrəli Uşaq Dəri-Zöhrəvi Dispanserinə hospitalizasiya olunub.

TƏBİB-dən bildirilib ki, körpəyə ilkin olaraq qoturluq diaqnozu təyin olunub və ona zəruri tibbi yardım göstərilib. Müalicəsi 2-ci Dermatoveneroloji şöbəsində davam etdirilib.
Aprelin 26-sı saat 16:30 radələrində azyaşlının bioloji ölüm faktı qeydə alınıb.

Digər məlumata əsasən, körpənin pnevmoniyadan öldüyü bildirilir.

Meyit təşrih olunması üçün Məhkəmə-Tibbi Ekspertiza və Patoloji Anatomiya Birliyinə təhvil verilib.

Baş vermiş hadisə ilə bağlı TƏBİB-in tabeliyində olan tibb müəssisələrində göstərilən tibbi xidmətin keyfiyyətinin qiymətləndirilməsi və ölüm hallarının təhlili üzrə komissiya tərəfindən araşdırma aparılır.