Türkiyədə keçirilən “EFES-2026” çoxmillətli birgə müştərək hərbi təlimi çərçivəsində növbəti tapşırıqlar uğurla icra olunub.

Realmedia.info xəbər verir ki, bu barədə Azərbaycan Respublikasının Müdafiə Nazirliyi məlumat yayıb.
Bildirilib ki, təlim planına uyğun olaraq iştirakçı ölkələrin hərbi qulluqçuları dənizdən sahilə hücum tapşırığını yerinə yetiriblər.



Ssenariyə əsasən, yüksəksürətli katerlərlə sahildə yerləşən şərti düşmən mövqelərinə yaxınlaşan qruplar intensiv atəş dəstəyi altında quruya çıxıblar. Hərbçilər istehkamları dəf edərək müdafiə mövqelərini qısa müddətdə zərərsizləşdiriblər.

Məlumata görə, həyata keçirilən effektiv əməliyyat nəticəsində sahil xətti tam nəzarətə götürülüb və desant qüvvələrinin təhlükəsiz şəkildə quruya çıxması üçün əlverişli şərait yaradılıb.

Qeyd edək ki, “EFES-2026” təlimi müxtəlif ölkələrin hərbi qüvvələrinin iştirakı ilə keçirilir və əsas məqsəd birgə əməliyyatların koordinasiyasını, döyüş hazırlığını və qarşılıqlı fəaliyyət imkanlarını artırmaqdır.