Azərbaycan Respublikasının Prezidenti İlham Əliyev və birinci xanım Mehriban Əliyeva aprelin 8-də Milli Aviasiya Akademiyası ərazisində yaradılan Beynəlxalq Təlim Mərkəzinin açılışında iştirak ediblər.

Realmedia.info xəbər verir ki, akademiyanın rektoru Arif Paşayev, rəqəmsal inkişaf və nəqliyyat naziri Rəşad Nəbiyev və Azərbaycan Hava Yolları QSC-nin İdarə Heyətinin sədri Samir Rzayev dövlət başçısına mərkəzin imkanları barədə məlumat veriblər.

Qeyd olunub ki, mərkəz “Azərbaycan Hava Yolları” QSC-nin təşəbbüsü ilə yaradılıb və burada uçuş heyətinin fövqəladə vəziyyətlərə hazırlığı, eləcə də hava hərəkətini idarə edən dispetçerlərin peşəkar hazırlığı həyata keçiriləcək.

Təlim prosesi Beynəlxalq Mülki Aviasiya Təşkilatı və Avropa İttifaqı Aviasiya Təhlükəsizliyi Agentliyi standartlarına uyğun qurulub. Eyni zamanda, Almaniyanın qabaqcıl təhsil müəssisələrindən olan Alman Aeronaviqasiya Akademiyası proqramları tətbiq ediləcək.

Mərkəzdə Heydər Əliyev Beynəlxalq Hava Limanı üzrə 360 dərəcə panoramlı dispetçer simulyatoru və radar idarəetmə sistemləri quraşdırılıb. Bu da mütəxəssislərin real şəraitə maksimum yaxın mühitdə təlim keçməsinə şərait yaradır.
Bundan başqa, müxtəlif xüsusi avtonəqliyyat vasitələrinin idarə olunması üçün müasir trenajorlar da istifadəyə verilib. Məlumata görə, hər il burada təxminən 30 dispetçer və 3 minə yaxın uçuş heyəti üzvü hazırlanacaq.

Mərkəz həmçinin Türkiyənin tanınmış şirkəti SkyArt tərəfindən təqdim olunan “A320/A321 NEO CEET” simulyatoru ilə təchiz edilib. Buraya “Boeing 787” üzrə qapı təlim qurğuları və yanğınsöndürmə simulyasiya sistemləri də daxildir.

Yeni yaradılan bu kompleks Azərbaycanın aviasiya sektorunda kadr hazırlığının keyfiyyətini artıracaq, beynəlxalq standartlara uyğun mütəxəssislərin yetişdirilməsinə və ümumilikdə uçuş təhlükəsizliyinin gücləndirilməsinə mühüm töhfə verəcək.