Azərbaycan Respublikasında rəqəmsallaşma sahəsində dövlət siyasətinin daha səmərəli və əlaqələndirilmiş şəkildə həyata keçirilməsi məqsədilə yeni qurum – Azərbaycan Respublikasının Rəqəmsal İnkişaf Şurası yaradılıb.

Bununla bağlı İlham Əliyev müvafiq fərman imzalayıb. Fərmana əsasən, Şuranın sədri vəzifəsinə Azərbaycanın Birinci vitse-prezidenti Mehriban Əliyeva təyin edilib.
Yeni yaradılan Şura ölkədə rəqəmsal transformasiya proseslərinin sürətləndirilməsi, elektron hökumət xidmətlərinin təkmilləşdirilməsi, innovasiya və süni intellekt texnologiyalarının tətbiqinin genişləndirilməsi istiqamətində fəaliyyət göstərəcək.

Qurumun əsas vəzifələri sırasında rəqəmsal inkişaf sahəsində prioritetlərin müəyyənləşdirilməsi, dövlət qurumları arasında koordinasiyanın gücləndirilməsi, milli texnoloji potensialın artırılması və rəqəmsal iqtisadiyyatın inkişafına dəstək verilməsi yer alır.

Şuranın tərkibinə bir sıra dövlət qurumlarının rəhbərləri və yüksək vəzifəli şəxslər daxildir.

Qeyd olunur ki, bu addım Azərbaycanın rəqəmsal inkişaf strategiyasının daha sistemli şəkildə həyata keçirilməsinə xidmət edəcək.