İlham Əliyev martın 25-də AzərEnerji ASC tərəfindən inşa edilən “Abşeron” Batareya Enerji Saxlanc Mərkəzinin açılış mərasimində iştirak edib.

Realmedia.info xəbər verir ki, “AzərEnerji” ASC-nin İdarə Heyətinin sədri Baba Rzayev dövlət başçısına layihə barədə ətraflı məlumat verib.

Bildirilib ki, Azərbaycan enerji sahəsində yeni inkişaf mərhələsinə qədəm qoyur. Prezidentin tapşırığına əsasən “AzərEnerji” ASC tərəfindən 100 faiz daxili maliyyə vəsaiti hesabına 500 kV-luq “Abşeron” və 220 kV-luq “Ağdaş” yarımstansiyalarının ərazilərində ümumi gücü 250 MVt, enerji tutumu isə 500 MVt/saat olan enerji saxlanc mərkəzləri yaradılıb. Bu miqyasda layihə təkcə Azərbaycanda deyil, MDB məkanında da ilk hesab olunur.

“Abşeron” mərkəzində 50 akkumulyator batareya və 13 invertor konteyneri quraşdırılıb. Layihə çərçivəsində beynəlxalq məsləhətçi şirkətlərin apardığı araşdırmalar göstərib ki, ölkədə bərpaolunan enerji mənbələrinin sistemə təhlükəsiz inteqrasiyası üçün bu cür texnologiyalar zəruridir.

Mərkəz çevikliyi ilə seçilir – sistemlər 2 saat ərzində tam doldurula və ya boşaldıla bilir. Günəşli saatlarda istehsal olunan artıq enerji burada toplanır və pik tələbat dövrlərində şəbəkəyə ötürülür.

Qeyd olunub ki, bu sistemlər vasitəsilə enerji şəbəkəsində sabitlik təmin edilir, qəfil enerji çatışmazlıqları avtomatik tənzimlənir, qəza riskləri azalır və ümumi etibarlılıq artır. Eyni zamanda, bərpaolunan enerji mənbələrinin payının artması fonunda sistemin dayanıqlığı gücləndirilir.

Dövlət başçısına həmçinin enerjisistemin rəqəmsal transformasiyası və yaşıl enerjinin inteqrasiyası istiqamətində görülən işlər barədə də məlumat verilib. Bildirilib ki, 2028-ci ilə qədər ölkədə 2100 MVt-dan çox yaşıl enerji gücü şəbəkəyə qoşulacaq.

Sonda Prezident İlham Əliyev “Abşeron” Batareya Enerji Saxlanc Mərkəzinin açılışını bildirən düyməni basıb.