Azərbaycan Prezidentinin köməkçisi, Prezident Administrasiyasının xarici siyasət məsələləri şöbəsinin müdiri Hikmət Hacıyev Budapeştdə Macarıstanın baş nazirinin Milli Təhlükəsizlik üzrə baş məsləhətçisi Marsell Biro ilə görüş keçirib.

Realmedia.info xəbər verir ki, bu barədə H.Hacıyev özünün X sosial şəbəkə hesabında paylaşım edib.

Prezidentin köməkçisi görüşün məhsuldar keçdiyini bildirib. Qeyd olunub ki, görüş Macarıstanın təşəbbüsü ilə Türk Dövlətləri Təşkilatı üzv və müşahidəçi ölkələrin dövlət və hökumət başçılarının diplomatik köməkçilərinin toplantısı çərçivəsində baş tutub.

H.Hacıyev vurğulayıb ki, Azərbaycanla Macarıstan arasında strateji tərəfdaşlıq bütün sahələr üzrə uğurla inkişaf edir. Onun sözlərinə görə, Macarıstanın milli maraqlara əsaslanan müstəqil siyasəti, həmçinin ortaq tarixi, etnik və mədəni bağlara söykənən türk dünyası ilə sıx əlaqələri və TDT çərçivəsində fəaliyyəti yüksək qiymətləndirilir.

PA rəsmisi əlavə edib ki, mövcud qlobal turbulentlik şəraitində türk dünyasının birliyi və həmrəyliyi xüsusi əhəmiyyət daşıyır.