Azərbaycanın xarici işlər naziri Ceyhun Bayramov Özbəkistanın xarici işlər naziri Baxtiyor Saidov ilə görüş keçirib.

Realmedia.info xəbər verir ki, görüş İstanbul şəhərində keçirilən Türk Dövlətləri Təşkilatının Xarici İşlər Nazirləri Şurasının qeyri-rəsmi toplantısı çərçivəsində baş tutub.
Görüş zamanı tərəflər Yaxın Şərqdə mövcud təhlükəsizlik vəziyyəti, regionda artan gərginlik və hərbi eskalasiya ilə bağlı geniş fikir mübadiləsi aparıblar. Nazirlər sabitliyin qorunmasının vacibliyini vurğulayıb, mövcud risklərin azaldılması üçün beynəlxalq əməkdaşlığın əhəmiyyətini qeyd ediblər.

Bununla yanaşı, münaqişələrin beynəlxalq hüququn norma və prinsiplərinə uyğun şəkildə, dialoq və diplomatik vasitələrlə həllinin vacibliyi diqqətə çatdırılıb.

Görüşdə həmçinin Azərbaycan ilə Özbəkistan arasında ikitərəfli münasibətlərin cari vəziyyəti və inkişaf perspektivləri müzakirə olunub, müxtəlif sahələrdə əməkdaşlığın daha da genişləndirilməsinin önəmi vurğulanıb.

Tərəflər qarşılıqlı maraq doğuran regional və beynəlxalq məsələlər üzrə dialoqun davam etdirilməsi barədə razılığa gəliblər.