İsveçrə Konfederasiyasının federal xarici işlər naziri İqnasio Kasis Azərbaycanın xarici işlər naziri Ceyhun Bayramova telefonla zəng edib.

Telefon danışığı zamanı tərəflər beynəlxalq və regional təhlükəsizlik məsələlərini, eləcə də Yaxın Şərqdə mövcud vəziyyəti müzakirə ediblər. Mövcud gərginliyin daha da artmasının yolverilməz olduğu vurğulanaraq, böhranın dialoq və diplomatik vasitələrlə həllinin vacibliyi qeyd olunub.

İqnasio Kasis həmçinin Azərbaycana qarşı İran tərəfindən həyata keçirilmiş dron hücumu ilə bağlı ölkəmizlə həmrəyliyini ifadə edib. O, İran ərazisindən İsveçrə vətəndaşlarının təxliyəsinə göstərilən dəstəyə görə Azərbaycan tərəfinə təşəkkürünü bildirib.

Nazirlər telefon danışığı zamanı Azərbaycan ilə İsveçrə arasında ikitərəfli əməkdaşlığın mövcud vəziyyəti və inkişaf perspektivləri barədə də fikir mübadiləsi aparıblar. Bildirilib ki, aprel ayında Xarici İşlər Nazirlikləri arasında keçiriləcək siyasi məsləhətləşmələr bu baxımdan xüsusi əhəmiyyət daşıyır.