Azərbaycan Prezidenti “France 24” telekanalına verdiyi müsahibədə Bakıda mühakimə olunan separatçıların mümkün əfv edilməsi məsələsinə münasibət bildirib.
Axar.az xəbər verir ki, jurnalist müsahibə zamanı Qarabağ bölgəsində fəaliyyət göstərmiş separatçı qurumun keçmiş rəhbərləri və digər şəxslərin əfv olunması ehtimalı barədə sual ünvanlayıb.

Prezident bildirib ki, sözügedən şəxslər Azərbaycanın beynəlxalq səviyyədə tanınmış ərazilərində qanunsuz fəaliyyət göstərən qurumun rəhbərləri olub və uzun illər azərbaycanlılara qarşı törədilən müharibə cinayətlərinə görə məsuliyyətə cəlb ediliblər. Onun sözlərinə görə, saxlanılan şəxslər hüquqi müdafiə ilə təmin olunub və məhkəmə prosesi qanunvericiliyə uyğun, şəffaf şəkildə keçirilib.

Jurnalistin yeni səhifə açmaq naminə əfv addımının mümkün olub-olmaması ilə bağlı sualına cavabında dövlət başçısı bu şəxslərin ağır cinayətlər törətdiyini qeyd edərək, belə bir addımın mümkün olmadığını vurğulayıb.

Müsahibə zamanı bölgəni tərk edən erməni əhalinin vəziyyəti də müzakirə olunub. Prezident bildirib ki, Azərbaycan hökuməti bölgədə yaşayan ermənilərə vətəndaşlıq və ya iş icazəsi üçün müraciət imkanını təqdim edib, lakin onların bir hissəsi Ermənistana köçməyi üstün tutub.

Dövlət başçısı eyni zamanda qeyd edib ki, vaxtilə indiki Ermənistan ərazisindən deportasiya edilmiş yüz minlərlə azərbaycanlının da geri qayıdış hüququ mövcuddur və bu məsələyə qarşılıqlı yanaşma tələb olunur. Onun sözlərinə görə, Azərbaycan qayıdış hüququnun universal prinsip olduğunu qəbul edir və bu hüququn təmin olunmasına hazırdır.