Azərbaycan Prezidenti İlham Əliyev İsveçrənin Davos şəhərində keçirilən Ümumdünya İqtisadi Forumu çərçivəsində “Euronews” televiziya kanalına müsahibə verib.
Dövlət başçısı müsahibə zamanı beynəlxalq münasibətlər sistemində baş verən dəyişikliklərə toxunub. Prezident İlham Əliyev bildirib ki, dünya yeni bir mərhələyə qədəm qoyub və hazırkı dövrdə beynəlxalq münasibətlərdə güc amili daha ön plana çıxır. Onun sözlərinə görə, bu reallıqlar fonunda hər bir ölkə öz milli maraqlarını qorumaq üçün müstəqil və praqmatik siyasət yürütməlidir.
Prezident Azərbaycanı etibarlı tərəfdaş kimi xarakterizə edərək, ölkəmizin həm regional, həm də qlobal səviyyədə əməkdaşlığın genişləndirilməsində maraqlı olduğunu vurğulayıb. O, Azərbaycanın beynəlxalq hüquqa əsaslanan mövqeyini davam etdirdiyini və xarici siyasətdə milli maraqların əsas prinsip olduğunu qeyd edib.
Müsahibədə Avropanın bəzi qurumları ilə münasibətlərə də toxunan dövlət başçısı bildirib ki, Azərbaycana qarşı qərəzli yanaşmalar ölkəmizin müstəqil siyasətinə təsir göstərə bilməz.
Qeyd edək ki, Prezident İlham Əliyev Davos İqtisadi Forumu çərçivəsində bir sıra görüşlər keçirib və müxtəlif beynəlxalq tədbirlərdə iştirak edib.