İsraildə İran kəşfiyyatı ilə əlaqədə olmaqda şübhəli bilinən müstəqil jurnalist saxlanılıb.

Realmedia xəbər verir ki, bu barədə “Ynet” portalı məlumat yayıb.

Bildirilib ki, hadisənin diqqət çəkən tərəfi jurnalistin məhz özünün polisə müraciət etməsindən sonra saxlanılmasıdır. Məlumata görə, yanvar ayının sonunda naməlum şəxslər sosial şəbəkələr vasitəsilə jurnalistlə əlaqə saxlayıb. O isə vəziyyətdən şübhələnərək məsələ ilə bağlı polisinin kibertəhlükəsizlik bölməsinə məlumat verib.

Lakin jurnalistin bu addımı İsrailin Ümumi Təhlükəsizlik Xidməti (Şin-Bet) tərəfindən fərqli qiymətləndirilib. İstintaqın iddiasına əsasən, jurnalistə pul qarşılığında Qüdsün mərkəzi küçələrinin və etiraz aksiyalarının fotolarını çəkmək təklif olunub. Jurnalist əvvəlcə bunu peşə fəaliyyəti ilə bağlı adi təklif kimi qəbul etsə də, sonradan müraciətin arxasında xarici agentlərin ola biləcəyini ehtimal edərək hüquq-mühafizə orqanlarına məlumat verib.

Polis və xüsusi xidmət orqanları jurnalistin saxlanılma müddətinin 8 gün uzadılmasına çalışsa da, vəkillərin şikayəti əsasında apellyasiya məhkəməsi bu vəsatəti rədd edib.

Məhkəmə qərarına əsasən, jurnalist hazırda ev dustaqlığına buraxılıb. Onun vəkili bildirib ki, müvəkkili cinayət törətməyib, əksinə, dövlətə kömək etmək niyyəti ilə hərəkət edib və hüquq-mühafizə orqanlarının onu şübhəli şəxs kimi təqdim etməsi əsassızdır.