Bakının Binəqədi rayonunda ağır qətl hadisəsi baş verib.

Hadisə rayonun 28 May qəsəbəsi ərazisində qeydə alınıb.
Məlumata görə, 30 yaşlı Taleh Qurbanov toy axşamı 37 yaşlı qaynı Qəlbinur Məmmədovla mübahisə edib. Mübahisə zamanı Qəlbinur Məmmədov bıçaq xəsarəti alıb və hadisə yerində həyatını itirib.

Yaxınlarının sözlərinə görə, tərəflər arasında əvvəllər ciddi problem olmayıb. Onlar eyni həyətdə yaşayır, qardaş və dost münasibətində olublar. Hadisə baş verən gün də birlikdə vaxt keçirdikləri bildirilir.

Qohumlar qeyd ediblər ki, baş verən hadisə ailənin toy sevincini yasa çevirib. Onların fikrincə, hadisənin baş verməsində spirtli içkinin təsiri də rol oynaya bilər.

Faktla bağlı Binəqədi Rayon Prokurorluğu tərəfindən Azərbaycan Respublikası Cinayət Məcəlləsinin müvafiq maddəsi ilə cinayət işi başlanılıb.

Hazırda hadisənin bütün halları üzrə araşdırma aparılır.