Şəmkir rayonunun Kür qəsəbəsində baş verən qətl hadisəsi ilə bağlı yeni təfərrüatlar məlum olub.

Realmedia.info xəbər verir ki, 16 yaşlı yeniyetmə tərəfindən qətlə yetirilən 19 yaşlı Ramal Quliyevin atası Malik Quliyev hadisə barədə danışıb.

Ata bildirib ki, oğluna vaxtında tibbi yardım göstərilməməsi onun həyatına son qoyub:

“Oğlumu bıçaqlayıb öldürüblər. Əgər həkimə vaxtında çatdırılsaydı, bəlkə də yaşayardı. Yarası çox dərin olmayıb, sadəcə daxili qanaxma baş verib, qan damarlardan bədəninin içərisinə axıb”.

Mərhumun yaxınlarının sözlərinə görə, hadisəni törətməkdə şübhəli bilinən 16 yaşlı şəxs Ramalı əvvəlcədən öz evinə çağırıb:

“Onu həyətə çağırıb, orada bıçaqlayıblar. Daha sonra yaralı halda evin içərisinə salıblar və kiməsə zəng ediblər”.
İlkin ehtimallara görə, hadisə qısqanclıq zəminində baş verib.

Qeyd edək ki, hadisəni törətməkdə şübhəli bilinən F.Paşazadə saxlanılaraq istintaqa cəlb edilib.
Faktla bağlı Şəmkir Rayon Prokurorluğunda Cinayət Məcəlləsinin müvafiq maddəsi ilə cinayət işi açılıb, araşdırmalar davam etdirilir.