Şəkidə yağan güclü yağışlar və sel suları bir sıra fəsadlara səbəb olub.

Realmedia.info xəbər verir ki, yağışlar nəticəsində Göynük kəndini Baş Şabalıd kəndi ilə birləşdirən ərazidə yerləşən körpünü sel suları aparıb. Hadisədən sonra sakinlərin gediş-gəlişi məhdudlaşıb.

Məlumata görə, kənd sakinləri əkin sahələrinə gedə bilmədiklərini və gündəlik işlərinin yarımçıq qaldığını bildiriblər.

“Suötürücü yağış suyunu götürmür. Bu hadisə tez-tez baş verir. İki gün əvvəl də dağılmışdı, düzəltdilər, yenə dağıldı. Əkin sahələrimiz kənddən aşağı hissədədir, keçə bilmirik. Bu səbəbdən bu gün işlərimizi görə bilmədik”, – deyə sakinlərdən biri bildirib.

Digər kənd sakini isə vəziyyətin daha da ağırlaşdığını vurğulayaraq, sel sularına görə insanların çətin durumda qaldığını qeyd edib:

“Özümü təhlükəyə atıb çörək almağa keçmişəm. Camaat ac-susuz qalacaq. Daşqınlar olur. Sel sularına görə pis vəziyyətdəyik. İşıqlarımız da yanmır”.