Realmedia.info xəbər verir ki, Siyəzən-Məşrif avtomobil yolunun 11-ci kilometrliyindəki Gilgilçay üzərində yerləşən körpünün bir hissəsinin uçması nəticəsində əraziyə dərhal aidiyyəti qurumlar cəlb olunub.

Siyəzən Rayon İcra Hakimiyyətindən bildirilib ki, uçmuş körpü barədə ölkə rəhbərliyinə operativ məlumat verilib və Azərbaycan Avtomobil Yolları Dövlət Agentliyinin (AAYDA) əməkdaşları əraziyə baxış keçiriblər. Hazırda "2 saylı Yol İstismar idarəsi" MMC müvafiq işləri aparır.

AAYDA-nın Mətbuat Xidmətinin rəhbəri Anar Nəcəfli qeyd edib ki, təhlükəsizlik tədbirləri görülüb və sürücülərdən alternativ olaraq Bakı-Quba-Rusiya Federasiyası ilə dövlət sərhədi yolunun 115-ci kilometrindən ayrılan Alxanlı yolundan istifadə etmələri xahiş olunur.

Hadisə nəticəsində körpüdən keçən qaz və rabitə xətləri də sıradan çıxıb, buna görə bölgəyə təbii qazın verilişi məhdudlaşdırılıb və rabitə əlaqəsində fasilələr yaranıb. Rayon mərkəzinə getmək üçün isə Şabran rayonu ərazisindən keçən alternativ yoldan istifadə olunur.

Fövqəladə hallar komissiyası və digər aidiyyəti dövlət qurumlarının nümayəndələri hadisə yerindədir, müvafiq bərpa işləri davam edir.