Bu gün günorta saatlarında Toğanalı–Kəlbəcər–İstisu avtomobil yolunun Murovdağ ərazisindən keçən hissəsində qar uçqunu baş verib.

Realmedia.info xəbər verir ki, bu barədə Azərbaycan Avtomobil Yolları Dövlət Agentliyi (AAYDA) məlumat yayıb.
Bildirilib ki, uçqun nəticəsində yolun hərəkət hissəsi 10–15 metr hündürlükdə qar kütləsi ilə örtülüb.

Hazırda yaranmış fəsadların aradan qaldırılması istiqamətində AAYDA tərəfindən təxirəsalınmaz tədbirlər həyata keçirilir. Hadisə ilə bağlı bütün aidiyyəti qurumlar məlumatlandırılıb.

Təhlükəsizlik baxımından Toğanalı və Kəlbəcər istiqamətlərində nəqliyyat vasitələrinin hərəkəti müvəqqəti olaraq məhdudlaşdırılıb.

Qurum sürücülərə alternativ olaraq Suqovuşan–Sərsəng su anbarı–Qozlukörpü–Kəlbəcər avtomobil yolundan istifadə etməyi tövsiyə edib.