ABŞ Prezidenti Donald Trampın İsrailin Baş naziri Benyamin Netanyahunu növbəti hücumlardan çəkinməyə çağırmasına baxmayaraq, İsrail İranın qərb və mərkəzi hissələrində yerləşən hərbi obyektlərə zərbələr endirib.

Məlumata görə, Tramp bundan bir neçə saat əvvəl bildirib ki, Təl-Əviv və Tehran arasında baş verən yeni qarşıdurmalar ABŞ administrasiyasının İranla apardığı sülh danışıqlarına təsir etməyəcək. O, qərarların Benyamin Netanyahu tərəfindən deyil, ABŞ rəhbərliyi tərəfindən verildiyini vurğulayıb.

“Bu, razılaşmaya heç bir təsir göstərməyəcək. Bütün qərarları mən verirəm. O qərar qəbul etmir”, – deyə Ağ Ev rəhbəri bildirib.

Xatırladaq ki, bundan əvvəl İranın İslam İnqilabı Keşikçiləri Korpusu (SEPAH) İsrail ərazisinə raket zərbələri endirib. Tehran bu hücumları İsrail ordusunun Beyrutda həyata keçirdiyi əməliyyatlara cavab kimi qiymətləndirib. Bu, son iki ay ərzində İran tərəfindən İsrailə qarşı həyata keçirilən ilk raket hücumu olub.

İran tərəfi hücum zamanı bərk yanacaqla işləyən “Xeybarşekan” ballistik raketlərindən istifadə etdiyini açıqlayıb. Bildirilir ki, raketlərin uçuş məsafəsi 1450 kilometr, çəkisi isə təxminən 4500 kiloqramdır. SEPAH zərbənin əsas hədəfinin hərbi aviabaza olduğunu və həmin bazadan Livan ərazisindəki hədəflərin vurulduğunu iddia edib.

Rəsmi Tehran İsrailin Beyruta endirdiyi zərbələri kəskin pisləyib və həyata keçirilən raket hücumunu xəbərdarlıq xarakterli addım kimi təqdim edib.

Bu arada ABŞ Prezidenti Donald Tramp İranı yenidən danışıqlar masasına qayıtmağa çağırıb. O, tərəflərin sülh razılaşmasına yaxın olduğunu iddia edərək, Tehranı yeni hücumlardan çəkinməyə səsləyib. Tramp bildirib ki, İran artıq öz cavabını verib və bundan sonrakı addımların diplomatik müstəvidə atılması məqsədəuyğun olardı.