ABŞ Venesuela hökuməti və bir sıra maliyyə qurumlarına qarşı tətbiq etdiyi sanksiyaları qismən yumşaldıb.
Realmedia.info xəbər verir ki, bu barədə ABŞ Maliyyə Nazirliyinin Xarici Aktivlərə Nəzarət İdarəsinin (OFAC) dərc etdiyi sənədlərdə qeyd olunub.

Sənədlərə əsasən, Vaşinqton müəyyən şərtlərlə Venesuela hökuməti ilə kommersiya müqavilələrinin bağlanmasına icazə verib. Bununla yanaşı, Rusiya, İran, Şimali Koreya və Kuba ilə əlaqəli şəxslərlə, eləcə də bəzi Çin qurumları ilə əməliyyatlara qoyulan məhdudiyyətlər qüvvədə qalır.

Qərara əsasən, Banco Central de Venezuela, Banco de Venezuela və digər dövlət banklarına beynəlxalq maliyyə əməliyyatları aparmaq, o cümlədən pul köçürmələri və maliyyə xidmətləri göstərmək üçün icazə verilib. Bu addım həmin bankların uzun müddətdir məhdudlaşdırılmış beynəlxalq fəaliyyətini bərpa etməyə yönəlib.

Qeyd edək ki, bu qərar ABŞ-nin Venesuela ilə münasibətlərində yeni mərhələnin göstəricisi kimi qiymətləndirilir. Daha əvvəl, yanvarın 3-də ABŞ Prezidenti Donald Trump Venesuelaya qarşı genişmiqyaslı əməliyyat həyata keçirildiyini açıqlamışdı. Həmin əməliyyat nəticəsində ölkənin keçmiş lideri Nicolas Maduro və həyat yoldaşı saxlanılaraq ABŞ-a aparılıb.

Sonrakı mərhələdə onlar Nyu-York federal məhkəməsində hakim qarşısına çıxarılıb və ittihamları qəbul etmədiklərini bildiriblər. Məhkəmə prosesi hazırda davam edir.