Çin ABŞ-nin Venesuelaya qarşı həyata keçirdiyi hərbi zərbələri kəskin şəkildə pisləyib.
Realmedia xəbər verir ki, bu barədə Çin Xalq Respublikasının Xarici İşlər Nazirliyinin (XİN) yaydığı rəsmi bəyanatda bildirilib.
Bəyanatda qeyd olunub ki, ABŞ-nin bu addımı beynəlxalq hüququn və BMT Nizamnaməsinin kobud şəkildə pozulmasıdır. Çin tərəfi belə hərəkətlərin regional sabitliyə və beynəlxalq təhlükəsizliyə ciddi zərər vurduğunu vurğulayıb.
“Biz Amerika tərəfini beynəlxalq hüquqa və BMT Nizamnaməsinin müddəalarına əməl etməyə, digər ölkələrin suverenliyi və təhlükəsizliyinə qarşı təcavüzkar addımları dərhal dayandırmağa çağırırıq”, – deyə XİN-in bəyanatında bildirilib.
Qeyd edək ki, Çin uzun müddətdir dövlətlərin daxili işlərinə müdaxiləyə qarşı olduğunu və beynəlxalq məsələlərin dialoq və diplomatik yollarla həllini dəstəklədiyini bəyan edir.