Baltik ölkələrinin — Estoniya, Latviya və Litvanın müdafiə nazirləri Tallində birgə hərbi hərəkətlilik məkanının yaradılması barədə razılaşma imzalayıblar.
Razılaşmaya əsasən, Baltik ölkələrinin silahlı qüvvələri, hərbi texnikası və logistika vasitələri üç ölkə arasında daha sürətli və maneəsiz şəkildə hərəkət edə biləcək. Sənəd sərhədlərarası bürokratik prosedurların minimuma endirilməsini və hərbi qüvvələrin operativ yerləşdirilməsini nəzərdə tutur.
Müdafiə nazirləri bildiriblər ki, bu təşəbbüs regionun təhlükəsizliyinin gücləndirilməsinə, mümkün təhdidlərə qarşı çevik və koordinasiyalı reaksiya verilməsinə xidmət edəcək. Layihə qeyri-rəsmi olaraq “hərbi Şengen” kimi dəyərləndirilir və NATO çərçivəsində birgə müdafiə imkanlarını artırmağı hədəfləyir.
Qeyd edək ki, Baltik ölkələri son illər regionda artan hərbi risklər fonunda müdafiə əməkdaşlığını intensivləşdirir və bu razılaşma həmin istiqamətdə atılan növbəti mühüm addım hesab olunur.