2025-ci il üzrə 9-cu siniflər üçün keçirilən buraxılış imtahanlarının nəticələri narahatedici faktı üzə çıxarıb.

Realmedia.info xəbər verir ki, bu barədə məlumat Dövlət İmtahan Mərkəzinin (DİM) "Abituriyent" jurnalının 12-ci sayında dərc olunub.

Məlumata görə, buraxılış imtahanlarında iştirak edən 9-cu sinif şagirdləri arasında 6 nəfərin oxuyub-yazmağı bacarmadığı müəyyən edilib.

DİM-in hesabatında qeyd olunub ki, bu cür halların imtahan rəhbərlərinin əksəriyyətinin protokollarında əks olunmaması səbəbindən real rəqəmin daha yüksək olması ehtimal edilir.

Məlumata əsasən, oxuyub-yaza bilməyən 9-cu sinif şagirdləri Gəncə şəhəri, Balakən, Beyləqan, Ağsu, Zərdab və Bakı şəhərinin Suraxanı rayonunda qeydə alınıb. Hər bir ərazidə bir nəfər belə şagird müəyyən olunub.

Qeyd olunub ki, fakt təhsil sistemində mövcud problemlərin araşdırılması və aradan qaldırılması istiqamətində ciddi tədbirlərin görülməsinin vacibliyini bir daha gündəmə gətirir.