Prezident İlham Əliyevin tapşırığına uyğun olaraq, işğaldan azad edilmiş ərazilərə Böyük Qayıdış proqramı çərçivəsində Cəbrayıl rayonunun Şükürbəyli kəndinə növbəti köç karvanı uğurla çatıb.

Məlumata görə, bu mərhələdə kəndə 45 ailə olmaqla, ümumilikdə 196 nəfər köçürülüb. Köç edən ailələr uzun müddət respublikanın müxtəlif bölgələrində, əsasən yataqxanalarda, sanatoriyalarda və inzibati binalarda müvəqqəti məskunlaşmış şəxslərdir.

Şükürbəyli kəndinə çatan sakinlərə yeni mənzillərinin açarları təqdim olunub və onların rahat yaşayışı üçün zəruri şərait yaradılıb.

Doğma torpaqlarına qayıdan sakinlər göstərilən diqqət və qayğıya görə Prezident İlham Əliyevə və Birinci vitse-prezident Mehriban Əliyevaya təşəkkürlərini bildiriblər. Onlar həmçinin torpaqlarımızın azad olunmasında xidmət göstərən Azərbaycan Ordusunun hərbi qulluqçularına minnətdarlıqlarını ifadə edib, şəhidlərin əziz xatirəsini ehtiramla yad ediblər.

Realmedia.info