🇦🇿 Müdafiə Nazirliyində şəhid Milli Qəhrəmanların ailələri ilə görüş keçirilib [xfgiven_qirmizi] [xfvalue_qirmizi] [/xfgiven_qirmizi]
Mayın 18-də Azərbaycan Respublikasının Müdafiə Nazirliyində şəhid Milli Qəhrəmanların ailələri ilə görüş təşkil olunub.
Görüşdə Azərbaycan Respublikasının müdafiə naziri Zakir Həsənov, müdafiə nazirinin birinci müavini – Baş Qərargah rəisi Kərim Vəliyev, Hərbi Hava Qüvvələrinin komandanı Namiq İslamzadə və digər rəsmi şəxslər iştirak ediblər.
Tədbir zamanı şəhid Milli Qəhrəmanlar — Vaqif Qurbanov və Pəncəli Teymurov ailə üzvləri ilə görüş keçirilib.
General-polkovnik Zakir Həsənov şəhidlərin ailələrinə başsağlığı verərək onların xatirəsinin daim uca tutulduğunu bildirib. O qeyd edib ki, Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyev və Birinci vitse-prezident Mehriban Əliyeva tərəfindən şəhid ailələrinə daim xüsusi diqqət və qayğı göstərilir.
Görüşdə vurğulanıb ki, şəhidlərin Vətən uğrunda göstərdiyi qəhrəmanlıq nümunələri Azərbaycan xalqının yaddaşında əbədi yaşayacaq.
Sonda şəhidlərin ailələrinə “Qızıl Ulduz” medalı və vəsiqələri təqdim olunub. Ailələr isə göstərilən diqqət və ehtirama görə minnətdarlıqlarını bildiriblər.
