Azərbaycan Silahlı Qüvvələrinin Baş Qərargah rəisinin sabiq müavini – Əməliyyat Baş İdarəsinin rəisi olmuş general-leytenant Ayaz Həsənovla bağlı məhkəməyə müraciət olunub.

Məlumata görə, onun barəsində mülki iddia qaldırılıb. İddiaya Bakıda məhkəmələrin birində baxılacaq. İddia artıq icraata götürülüb və məhkəmənin hazırlıq iclası fevralın 13-nə təyin edilib.

İddiada qeyd olunur ki, Ayaz Həsənovun ev alqı-satqısı ilə bağlı verdiyi sözə əməl etmədiyi iddia edilir. Bildirilir ki, o, Novxanıda yerləşən bağ evini satarkən evi təmir edəcəyini vəd etsə də, bu vədə əməl etməyib. Alıcının bir neçə müraciətinə baxmayaraq məsələ həllini tapmayıb. Bu səbəbdən alqı-satqı müqaviləsinin ləğvi üçün məhkəməyə müraciət edilib. Hazırlıq iclasında general-leytenantın əmlaklarına həbs qoyulması ilə bağlı vəsatətin veriləcəyi gözlənilir.

Qeyd edək ki, Ayaz Həsənov 2017–2021-ci illərdə Azərbaycan Silahlı Qüvvələrinin Baş Qərargah rəisinin müavini – Əməliyyat Baş İdarəsinin rəisi vəzifəsində çalışıb. O, 23 iyul 2021-ci ildə vəzifəsindən azad edilib.
Bildirək ki, Ayaz Həsənov Silahlı Qüvvələrin sabiq Baş Qərargah rəisi Nəcməddin Sadıkovun yaxın çevrəsinə daxil olan şəxslərdən biri kimi tanınır.