Dövlət Gömrük Komitəsində müxtəlif yüksək vəzifələrdə çalışmış, hazırda təqaüddə olan polkovnik Həbib Bağırlı barəsində inzibati həbs qərarı verilib.
Oxu.Az-ın “Qaynarinfo”ya istinadən verdiyi məlumata görə, 1980-ci ildə Naxçıvan Muxtar Respublikasında anadan olmuş Həbib Bağırlı haqqında İnzibati Xətalar Məcəlləsinin 528.1-1-ci maddəsi ilə protokol tərtib olunaraq məhkəməyə göndərilib.
423 min manatlıq borc məsələsi
Məhkəmə araşdırması zamanı məlum olub ki, Həbib Bağırlının Bakıda fəaliyyət göstərən Açıq Səhmdar Cəmiyyətlərdən birinə 423 489 manat 69 qəpik məbləğində borcu yaranıb.
2024-cü ildə Nərimanov Rayon Məhkəməsi borcun ödənilməsi ilə bağlı qətnamə çıxarsa da, uzun müddət ərzində Bağırlı yalnız 99 min manata yaxın ödəniş edib. Nəticədə 325 min manatdan artıq borc ödənilməmiş qalıb.
Məhkəmədə verdiyi açıqlama
Həbib Bağırlı məhkəmədə bildirib ki, uzun illər gömrük orqanlarında çalışıb və hazırda pensiya alır. O qeyd edib ki, aliment ödədiyi üçün təqaüdünün 60 faizi həmin ödənişlərə yönəlir.
O, həmçinin bağ evini girov qoyduğunu və həmin evin satılaraq borcun ödənilməsinə yönəldildiyini bildirib və protokola xitam verilməsini xahiş edib.
15 günlük inzibati həbs
Məhkəmə isə polkovnikin müraciətini təmin etməyərək onu təqsirli bilib və barəsində 15 gün müddətinə inzibati həbs qərarı çıxarıb.
Səfər Mehdiyevin köməkçisi olub
Qeyd olunur ki, Həbib Bağırlı 2018–2022-ci illərdə Dövlət Gömrük Komitəsinin sabiq sədri Səfər Mehdiyevin köməkçisi kimi fəaliyyət göstərib.
2022-ci ildə Mehdiyev vəzifəsindən azad edildikdən sonra Bağırlı da işdən çıxarılıb və təqaüdə göndərilib. Daha sonra 2022–2024-cü illərdə “Səba” ASC-də təftiş və nəzarət şöbəsinin müdiri vəzifəsində çalışıb.
Şirkətə ziyan vurduğu ehtimal olunur
Məlumata görə, ehtimal edilir ki, Həbib Bağırlı ASC-də işlədiyi dövrdə şirkətə 423 min manatdan artıq ziyan vurub.
Xatırladaq ki, o, gömrük orqanlarında çalışdığı müddətdə “Dövlət qulluğunda fərqlənməyə görə” və digər mükafatlarla təltif olunub.