2025-ci ildə Azərbaycanda psixi və davranış pozuntuları diaqnozu ilk dəfə qoyulan şəxslərin sayı 6 min nəfəri ötüb.

Realmedia.info xəbər verir ki, Dövlət Statistika Komitəsinin məlumatına əsasən, psixoaktiv maddələrin qəbulu ilə bağlı olan pozuntular istisna olmaqla, ötən il ərzində 6 063 nəfərə ilk dəfə psixi və davranış pozuntuları diaqnozu qoyulub.

İlk dəfə qeydiyyata alınan şəxslərdən 4 499-u kişi, 1 564-ü isə qadın olub.

Yaş qrupları üzrə statistikaya görə, yeni diaqnoz qoyulan şəxslərin 2 466-sı 0-17 yaş, 1 591-i 18-29 yaş, 698-i 30-39 yaş, 1 308-i isə 40 və daha yuxarı yaş qrupuna aid edilib.

Komitənin açıqladığı rəqəmlərə əsasən, 2025-ci ildə ölkə üzrə tibb müəssisələrində qeydiyyatda olan psixi və davranış pozuntulu xəstələrin ümumi sayı 111 min 560 nəfər təşkil edib.

Qeydiyyatda olan xəstələrin 79 min 968-i kişi, 31 min 592-si isə qadındır.

Yaş bölgüsünə görə, qeydiyyatda olan xəstələrin 13 min 867-si 0-17 yaş, 29 min 723-ü 18-29 yaş, 22 min 851-i 30-39 yaş, 45 min 119-u isə 40 və yuxarı yaş qrupunda qeydə alınıb.

Mütəxəssislər psixi sağlamlığın qorunması, erkən diaqnostika və vaxtında müalicənin cəmiyyətin sağlam inkişafı baxımından mühüm əhəmiyyət daşıdığını bildirirlər.