Hazırda paytaxtda və respublikanın bəzi bölgələrində müşahidə olunan yağışlı hava şəraiti yol hərəkəti iştirakçıları üçün əlavə çətinliklər yaradır.

Realmedia.info xəbər verir ki, bu barədə Baş Dövlət Yol Polisi İdarəsinin (BDYPİ) sürücülərə ünvanladığı müraciətdə bildirilib.

Qeyd olunub ki, yağışlı hava yol örtüyünün sürüşkənliyini artırır, görmə məsafəsini məhdudlaşdırır və nəticədə yol-nəqliyyat hadisələrinin başvermə riskini yüksəldir.

BDYPİ sürücülərə müraciət edərək hava şəraitini düzgün qiymətləndirməyi, sürət həddinə ciddi riayət etməyi, ara məsafəsini normadan artıq saxlamağı və nəqliyyat vasitələrinin texniki vəziyyətinə daim nəzarət etməyi tövsiyə edib.

Eyni zamanda, qəfil manevrlərdən çəkinməyin vacibliyi vurğulanıb.

Qurumdan bildirilib ki, əlverişsiz hava şəraitində diqqətli, intizamlı və səbirli davranış yol təhlükəsizliyinin təmin edilməsində mühüm rol oynayır və bütün hərəkət iştirakçıları qaydalara ciddi əməl etməlidirlər.