Hazırda ölkə ərazisində, xüsusilə dağlıq rayonlarda soyuq və şaxtalı hava şəraiti müşahidə olunur.
Realmedia “Qafqazinfo”ya istinadən xəbər verir ki, bununla əlaqədar Fövqəladə Hallar Nazirliyi (FHN) əhaliyə müraciət edib.
Müraciətdə bildirilir ki, xüsusilə dağlıq ərazilərdə yaşayan və ya həmin ərazilərə səfər edən vətəndaşlar şaxtalı hava şəraitində mümkün qədər yaşayış məntəqəsini tərk etməməlidirlər. Zərurət yarandığı halda isə hərəkət istiqaməti barədə yaxınlarını əvvəlcədən məlumatlandırmaları tövsiyə olunur.
Qeyd edilir ki, avtomobillə hərəkət zamanı nəqliyyat vasitəsinin texniki vəziyyəti mövsümə uyğun olmalı və kifayət qədər yanacaq ehtiyatı təmin edilməlidir. Həmçinin qar uçqunu ehtimalı olan ərazilərdən, dik yamaclardan uzaq durmaq və günün qaranlıq vaxtına qalmadan yaşayış məntəqəsinə geri dönmək tövsiyə edilir.
Nazirlik eyni zamanda soyuq hava şəraitində qaz və elektrik qızdırıcı cihazlarından istifadənin artdığını nəzərə alaraq, yanğın təhlükəsizliyi qaydalarına ciddi riayət olunmasının vacibliyini xatırladır. Nasaz, qeyri-standart və kustar üsulla hazırlanmış qızdırıcı cihazlardan istifadə edilməməli, elektrik şəbəkəsi həddindən artıq yüklənməməli, işlək vəziyyətdə olan cihazlar nəzarətsiz qoyulmamalıdır.
FHN vətəndaşlara xəbərdarlıq edərək bildirib: “Unutmayın: Qaydalara biganəlik – həyatımıza təhlükədir! Təhlükə zamanı 112-yə zəng edin!”