Bayram günlərində ölkə üzrə avtomobillə səyahətlərin sayı əhəmiyyətli dərəcədə artır.
Baş Dövlət Yol Polisi İdarəsindən (BDYPİ) bildirilib ki, bu səfərlər zamanı adətən qeyri-müntəzəm sərnişin daşıma fəaliyyəti ilə məşğul olan avtobus və mikroavtobuslardan istifadə olunur.
Lakin təəssüf ki, belə daşımalar zamanı avtomobillərin texniki vəziyyəti, sürücülərin reysqabağı tibbi müayinəsi və iş-istirahət rejiminə riayət olunması kimi vacib məsələlər nəzərə alınmır. Eyni zamanda, nəqliyyat vasitəsinin keçəcəyi ərazinin relyefinə uyğunluğu, meteoroloji şərait və sürücünün təcrübəsi barədə diqqət yetirilmir ki, bu da xüsusilə dağlıq bölgələrdə yol-nəqliyyat hadisələrinin riskini artırır.
BDYPİ həmçinin qeyd edib ki, son illər səfərlərdə kirayə avtomobillərin istifadəsi də artıb. Ancaq kirayə avtomobillərin texniki vəziyyəti və sürücünün peşəkarlıq səviyyəsi barədə əvvəlcədən məlumatlı olmamaq potensial təhlükə yaradır.
İdarə sürücüləri və sərnişinləri tövsiyələrə əməl etməyə, səyahətlərini bu sahədə ixtisaslaşmış hüquqi və ya fiziki şəxslərə etibar etməyə çağırıb.