Azərbaycan Respublikası Prezidentinin təşəbbüsü ilə Milli Məclis tərəfindən qəbul edilən “Konstitusiya və Suverenlik İli” münasibətilə amnistiya elan edilməsi haqqında 19 dekabr 2025-ci il tarixli Qərarın icrası başa çatıb.

Realmedia.info xəbər verir ki, bu barədə Ədliyyə Nazirliyi məlumat yayıb.

Bildirilib ki, amnistiya aktının icrası 4 ay müddətində qeyri-hökumət təşkilatları, media və digər vətəndaş cəmiyyəti nümayəndələrinin iştirakı ilə həyata keçirilib.

Qeyd olunur ki, dövlətin humanizm siyasətinin növbəti təzahürü olan bu qərar indiyədək tətbiq edilən ən geniş amnistiya aktı hesab olunur. Ümumilikdə 22 935 şəxsə amnistiya tətbiq edilib.

Onlardan 5 348 nəfər azadlıqdan məhrumetmə cəzasından azad olunub, 3 555 məhkumun isə cəza müddəti 6 ay azaldılıb.

Bundan əlavə, azadlıqdan məhrum etmə ilə bağlı olmayan cəzalara məhkum edilmiş 9 714 şəxs amnistiyadan yararlanıb. Həmçinin 3 259 şəxs cinayət məsuliyyətindən azad edilib.

Ədliyyə Nazirliyinin məlumatına görə, bu amnistiya aktı dövlətin humanist cəza siyasətinin davamı olaraq sosial ədalətin və insan hüquqlarının təmininə xidmət edir.